Čitan ča si pisal i ča su pisali od Tebe, gledan Te na slikah. Vidin: pul rečkega Mrtvega kanala šećeš zapolnevnu rutu; a nejde osred „pisnikovanja“ zagrnjeni smo s Tvojun veličinun, pak nan se čini, oholen, da nismo va ten posle baš premići. I pul Ronjgi je vavek slika za videt: Tvoja uvodna proučena beseda, manje al više ogrnjena al pokrivena smehon. Vavek više, aš smeh je Tvoj izbor za pisat, za bit va kumpanije, za kantat, za zdignut žmuj črnega. Za pokazat nas: takovi smo! Pak ča?! Ne rabi se za to ubit!

Ovi dni dobila san va mejle srećnu misal i poduku i baš mi za Te rabi takova:

„...Možemo se, dakako, žalostiti ili negodovati nad činjenicom da je svaki čovjekov zavičaj malen, tih ili nečujan. No, svaka je parcela našega života i jedini naš okvir, a o ljudskoj odnosno duhovnoj snazi ovisi hoće li usko mjesto i kratkotrajni trenutak postati očišćeni kutak i dotaknuti rubove basne, jedina vrata nebesa ..."

Ražalostili su te, najmanje rečeno, aš nisu razumeli te particelice od našega sakidajnega zajika, va ken su besedi još i manje, kako da bi griži, prezidi, ogradi, lesi, a od keh je trebe i mora se storit se ono ča pokažuje kakovi smo. Besedi ne vavek lepe za oko ni za uho. Ma kemu se to, vavek, ne pijažaju? Ten neken z visoka, ki vavek kritiziraju. A besedi su te i takove jedine ke imamo i čuvamo ih kako god umemo i znamo.

Ča njih se odreć al za njih otpirat jedine vrata literarno dosegnuteh nebes?

„ZaviČAjna sreda“ sredu, 29. X. va Čitaonice na Korze 

Gradska biblioteka Rijeka, Radio Rijeka, Društvo hrvatskih književnika, ogranak Rijeka i Ustanova „Ivan Matetić Ronjgov“ Ronjgi, Viškovo, te se va programe „ZaviČAjna sreda“ sredu, 29. X. 2014. va Čitaonice na Korze broj 24, na šest ur zapolne, na 95. letnjicu rojenja Zorana Kompanjeta spametit na svojga pjesnika, člana, ratnega druga i prijatela, kade te bit akademik Petar Strčić, Dušan Prašelj, dr. sc. Jasna Gržinić, Silvija Benković Peratova, Marija Trinajstić, dr. sc. Rajka Jurdana Šepić, Vlasta Sušanj Kapićeva i njegovi z Grada Opatije.

Ni više one visoke i neprekinjene žice na Rečine skroz ku si gledal mater i oca, kad si kako otrok moral poć ća od domi za ziškolat se. Sada tuda pasuješ, grajan rečki, čovek od sveta, z rojenun svojun i dragun Opatijun va nedreh, ku si pokle seh never su arival opkantat. Tako lepo si njoj kantal, pa lahko da pokle Tebe neće bit već nijenega ki će znat zakantat svojoj šprlentastoj minjoj, z rožicami naprofumanoj, ka večno pred modren zrcalon stoji i načinja se. A zrcalo njoj voga i voga, vavek najlepše njije sliki pred nogami njoj slaže.

Ni ih bilo takoveh i teško da će ih već bit! Još ga ni videt.

Sigurno pasuju i spomeni, ča ne? Ni više ni one kumpanije va školskeh klupah va sušačkoj gimnazije, kade si mladost paseval vadeć se, vragajuć i kantajuć.

Ni više ni Tvoje studentske mladosti z Drugen raton prekinjene. Malomanj je sto let pasalo a svet opeta nemi. Profit vrta, a se pod imenon od slobodnega mićega čoveka. Fažizam nan ni više preko žice, nego saku večer doma škatuli špija i gledamo ga zabjeno, kako da j' se komać počelo. I moren videt ono vreme kada ste se, mladi i z jaklenemi misli, solidarno šli tuć za nov slobodni svet za sakidajnega čoveka. Aš da neka bi se potrle i da neka ne bi više bile one granice mej seh sorat siromašćinun i bogatijun, ke su vavek bile. Pa da bi ta mići čovek imel i dela, i za jist saki dan koliko mu rabi, i kako bi mogal obdržat svoju familiju i zgojit decu do školi, do arta, do živjenskega veselja, prez straha ...

Ni pul Ronjgi Te ni za povedet, za sporučit misal s ćakulun, smehon i kanton, za pozdignut žmuj: da bimo i kletu! Se skupa onako lepo rasporejeno kakov si i sam bil. Malo ih je još ostalo, oneh od onda kad je rabilo storit prvi koraki za odužit se „istarskemu kantu ćaće“ i soj našoj bogatije od kanta, sopnjadi i od besed. Ma još vavek imaju za Te i misal i rožicu za na trsački grob zanest. Ča ćeš, vreme je prneslo neki novi judi, mladi su i puni voji, onakovi kakov si nan ostal va pamete.

Ovi dni rekla mi je dr. sc. Jasna Gržinić, kad je ono pripravjala doktorat i knjigu od Tebe: ni bilo nijeneh vrat ke njoj se nisu otprle na spomen Tvojga imena. Retko se najde takov čovek, govori, kega si vole.

Ni znali nismo ma ni pomisleli, ne zameri, dokle si s nami bil, kako lišo pasujemo pjesnički put po ken smo bili počeli tapat. Ni danas ni vavek lahko, ma su laginju si nan, i onda i sad,Ti platil.

Veramente, Pjesniče ... s Tobun smo se sagdere dičili, s Tobun smo bili na diku i ponos ... i, ne prez suzi, zdižen žmuj Tvojga, črnega ...

 

Teštament veselega starca

Sini moji i vnuki mladi,

telo mi umira,

pomalo se hladi

će mu se mira.

 

Moje bogatstvo je velo:

puno od života radosti

i ljubavi za knjigu i delo,

za sakega dosti.

 

I kad zdahnen, suze neću,

ni rožice, ni sveću.

Leh natočite žmuji,

dragi sini i vnuki moji!

Pijte vino ko veseljen mami,

ono će tugu sprat,

a ja ću bit va vami,

pa ćemo skupa uživat!

Zoran Kompanjet

Fotografije: Ustanova "Ivan Matetić Ronjgov", Ronjgi, Viškovo