Mamina i majkina starina
![Mamina i majkina starina](/var/plain_site/storage/images/magazin/teme/mamina-i-majkina-starina/55095-1-cro-HR/Mamina-i-majkina-starina_article_full.jpg)
Po pravice san mislela da se niman već ča mutit okol svojeh...
...pasaneh radijskeh vremen. Se do one suzi ka, kako va fraze i metafore, jušto v' oko pade. Aš se je celo leto dan slagalo i se se j' najzad posložilo:
pogovori z judi, a najviše z ženskemi od pera i besedi, stara lementanja i ponovjeni dopisi, nova poznanstva i lov na neki stari jalovi koraki.Pak promocije od čakavskeh knjig od Lovrana preko Opatije i Ronjgi do Reki. Zaten čakavski bardi na CD-eh, Čansonfest kemu j' pokle sto let va glave prosvetilo da je osred Kastva i da su tamo i neki pravi, a ne samo divi, Kastafci. Za na prsti ih pobrojit, ma sejeno.
Anegdota prva
Bilo j' pusno vreme, vrime od mesopusta. Kad je Pavešić zišal s Kavani Kontinental na Sušake, zagjedal je kako na moste, Titoven trge, prometni milicioner ( aš to je to vreme ) regulira promet, maše z rukami i dela red mej auti. Pavešić se potreso po sen raskrižjen zaputi do njega, ćukne ga po ramene i oštro ga pita legitimaciju.
„Da malo vidin ki ste,“ govori mu, „aš ki mi garantira da se i Vi niste maškaral va policjota.“
Nasložilo se j' vrnjane va zgubjene vremena i mesta, ćapevane friškega zraka i kanta, propuhevane zaštropaneh piski i dricane zmašćene duši. Drama!
I neke letnjice su se zaplele i storile svoje. Ovo leto, stran ča j' pasal cel vek od Prvega sveckega rata va ken je bil naš nono, mići kapural osred velega sveckega macela, kako je sam rekal, pa smo se povjeste vadili i od njegoveh i nonineh štorij, zamešale su se i neke druge radi keh je naša čreda za skazat se danas. Va toj povjeste ku današnju živemo kako budućnost, pak ne znamo točno kade j' kemu vremenu granica, slika j' zbliza preveć zrnata, mutna.
Ma, dotekle su nas i neke leta. Pak s teh stran moremo videt da smo bili suvremeniki neken našen velikanon i vreme nan je to za reć, zarad njih i zarad nas.
Ovo leto se puni sto deset let od kad se j' v Opatije rodil Drago Gervais, a devedeset i pet let je od rojenja Zorana Kompanjeta, Davida Kabalina i Ljubota Pavešića, si tri su se mladi nauživali strahot od Drugega rata. Njih smo mogli čut i videt, bili su mej nami.
Va prvoj čakavskoj radijskoj škvadre bili su:
Ivan Cunt i Anton Mavrinac Filonov z Gromišćini, Berislav Cuculić s Praputnjaka, Ante Rubeša al Tončić Božinov s Kastva, Nikola Luzer svojen vnukon, školanon Nikicun Petkovićen, Pjerina Medanić injija sestra Vika Varga, al Jovanica i Nadalica z Bakra, Meri Doričić s Trsata. Za ten su prihajali mlaji, Kastafki Cvjetana Miletić, Vlasta Sušanj Kapićeva, Borka Ćiković Jugo, Nikolina Majster s Hrastenic, Mirjana Aničić od Pobar, Gordana Viškanić z Opatije, Franjo Deranja z Novega, Sonja Mulac od Grbac, Smilja Burić s Kraljevice, Dragica Mažuranić, Ademir Pavletić, Nenad Gudac, Tomislav Kraljić, Franjo Švob s Fužin i novinar Vladimir Jugo ki je Pavešića nasledil.
Ako san kega pozabila, a lahko da san, neka mi ne zameri. Ne moren se više ni spametit seh, aš va ono vreme san morala bit i doma z decun.
A ovako je Ljubo videl samega sebe 1975. leta kad mu je štampana prva samostalna čakavska zbirka pjesam „Mamina starina“:
Po bure, ka hita grmi dole, 28. jenara 1919., Ljubo se j' rodil va Škrljeven, selu va okolice Rike. Nekuliko dan kasneje majka Kata ga pofašanoga – kot da nosi fagot – ponesla krstit. Povedaju da se malčić plakal više na vodu leh na sol.
Čujen ga i sad kako se smeje spod brka: Na vodu, na vodu, aš ni va postole ni dobra!
Ljubotu je još i dvajset let od kad je umrl.
Orko, sigurno nejde pipa al otresa bukin, dobro san to odbavil, takoreć točno na uru, ne samo va mesec!
Z nekega zadnjega kantunića va misle zilezla je još jena letnjica, kako kresnica va festivalskoj kastafskoj noće. Osred Crekvini dokle san na pozornice namajala ča već san, a san baš zato do te pozornice prišla, aš je puneh pedeset let pasalo od kad je prva čakavska emisija na ten svete šla va radijski eter. Uputil ju je Ljubo Pavešić, Škrljevčan, rojeni čakavac, radijski novinar, publicist i čakavski pjesnik.
Tamo nejde, dosta blizu, bila san i ja. Ma ne sama. Bili smo si oni keh nas je od Brseča do Senja, od Bakra do Kastva, od Trsata do Gromišćini, od škoja do škoja iskal i nahajal: čakavski govorniki ki bi morali znat i pisat.
Ljubo Pavešić je prej sega bil radijski novinar, ča znači da je pred mikrofonon imel se. Lep muški glas, bariton, dodelan, ča bi se reklo, kultiviran način pisanja, čitanja i govora. Ov dan slažuć emisiju i naslišajuć na Radije njegovi arhivirani prilogi rekla je njegova mlada kolegica: pjesnika se čuje kako čita, a ne novinara.
Anegdota druga
Ljubo j' bil vavek za škerac parićan. Tako je va Brseče va oštarije pul Jenice zagledal kako judi briškulaju i vaje se j' prikoštal kibicirat. Mej njimi je igral i Miro Boninkin i pogledal je va Ljubota. A Ljubo ga pita: „Ča me tako grdo gledate?“. A Miro mu odgovori kot s topa: „Da ste sled lepči bin Vas malo lepče i gledal!“
Pa i kad je po Korze pasal nisi ga mogal ne videt: Štanjega junaka s črnemi vlasi i brki, smehon v očijah i va obaveznoj stomanje na Ve, polo majice, ka se onda ovde ni još tako zvala i ka spod vrata ni imela puci za zaputit nego škujice skroz ke je bila provučena uska traka od satenskega fijoka, kadagod zavezana va fijok, ki god put i ne. I koj nigdere ni mogal nać velega broja za se, nego samo pul butigera Zvaneta va Brseče.
Neka mi bude oprošćeno, ma ni već jako nijedan ostal za ovo zreć i ki zna kad će opet bit kakova prilika i ki zna ko će ki od njegove radijske škvadri ostat, već sada fali njin broja. Spametin se na oneh s kemi san delila studio i mikrofon, veselje i škerac, na dobri judi i prelepi domaći glasi z našega širega i užega zavičaja, keh smo po prvi put mogli naslišat, onako na kupe samo i jedino va njegovoj emisije. Po prvi put smo i mi sami počeli raspoznavat svoj zavičaj po glaseh, kastafskeh, gromiškeh, bakarskeh, bodulskeh ....
A seh, i judi i glasi, je iskal i zibral po svojoj mere. I stavil ih va za ono vreme moderan medij. Pak je tako i ča, sako malo kroz povjest pozabjeno i zanemareno, od domi zišlo va bližnji i dalnji svet, bordiža i danas.
Ov tekst ne bi bil...
...nikad napisan da se na staru domaću ješku, na ku i sama najboje grizen, nisu naješkali i neki stari i mladi čakavci. Zahvalna san:
Vladimiru Rončeviću i Alenu Čemeljiću, zapovjednen i izvršnoj novinarke Tatjane Sandalj z Radija Reki. Se j' šlo pod regulu, komandu, minutažu i posluh od starejeh i po špage, čemu se nisan mogla ni nadat. Saka čast! Prigovor?! Lahko da je, pak ča sada?!
Va Gradskoj biblioteke Rijeka jako je lepo bilo delat z Verenun Tibljaš, pak se nadejen da smo samo na početke jenega dela od čitaoničkega programa „ZaviČAjna sreda“, ka će nan sen pomoć da skupa z našemi čakavskemi i kajkavskemi pisci ( opet ) pridemo i do svojga zajika.
Fotografije: CD Čakavski bardi/Vojo Radoičić