Prez sega dobrega i lepega ča bi njoj po soj zasluge bilo moglo pripadat, da je bilo a ni, va črnoj samine pogasila se je slabašna živjenska svećica od jene posebne bodulske i ženske sudbini, one od Katice Jurićeve s Punta,

mr. sc. Katice Brusić, povjesničarki umjetnosti.

Od detinjstva, od rodne kuće se do ranega školovanja i studiranja dugo od domi i od svojeh, otela je samo jeno: vrnut se na svojo i pomoć svojoj domovine i starine. Odrastala je va starinskoj, patrijarhalnoj sene, pod lumbrelun od muškega ordina, tobože zaštićena. Spoznala je vas svoj domaći svet, način od njegovega živjenja, i roda, i susešćini, prez miloserja za bilo kakovu slabinu ale bol. Saku se je bol moralo skrivat i skrit kakogod, aš drugačje je bilo još i teže za živet.

Za sen ča su njoj seni bile najboje kumpanjice zapametili su je kako veselu pršonu. Za sen ča je svojen najbližen čuda davala, a malo dobivala, sejeno njin je bila vavek na saku ruku, parićana za pomoć. Tako je so svojo znanje od povjesti i povjesti umjetnosti predavala va školah i na dele, najzad va Konzervatorsken odjele v Reke, kade je dofinila svoj radni vek. Nijenemu posebno na dobren oke, više je takova pačila, kako ča je pačila i njija voja da sako delo i počne i zafini kako se delu i pristoji.

image0 (1)

Pak je od radnega zadatka, kega je dobila i s ken su poslodavci misleli da te je tako stavit po strane, storila više nego interesantnu štoriju. Od se umjetnosti, ku je poznavala i mogla delat, dobila j´ za delo obdelat civilni logori keh su partizani organizirali i delali kako bi mogli premešćat i čuvat lokalno stavovništvo za vreme taljanskeh i njemačkeh ofenziv od 1941. do 1945. leta, ke su onda haračile va Gorsken kotare i po kvarnerskeh otokeh.

Rashodila se je povjesničarka po goranskeh šumah i po bodulskeh gromačah. Pronašla je judi ki su je pejali po ondašnjeh šumskeh i pastirskeh stazah i kozjeh puteh, a ki su bili partizanski kuriri i vodiči. Danaska su, zdavni već, i stazi i puti zarašćeni. Ni poznat ni kade su bili. Ni više ni oneh dobreh pastiri ki su saku škuru noćnu uru mogli preteć, preletet od Gromišćini do Prezida, al kamo je već rabilo, za prenest vojnu komandu. Ni više ni oneh mićeh judi, civili, ale retki su morda još ostali, čigove sudbini su ostale zapisane va Katičineh dnevnikeh. Kako spomen tako i kako opomena, aš saki je rat strahota, pogotovo za nemoćneh.

Našla je i se puno ostatak od civilneh logori, ki su bili pod šmrekami, pod vedren nebon al va barakah, kamo su se civili, najviše ženske, deca i starci, ugnjevali, kako bi mogli preživet čelične vojne ofenzivi. Obnašla je se puno dokumenat va keh piše jako čuda dobrega i ne dobrega ča se je s partizanske strani delalo va ono vreme. I se je to pospravila va arhivu, pak je radi tega se kemugod, pogotovo prvoborcu, bil težak njok va grle.

image0-005

I spametin se, aš smo bile skupa, zadnji put je 1991. leta obahajala i dofinjevala svojo delo po puntarskeh grižah i klanceh, kade je poznavala si kameni zdenci za žejnu zemju i judi. A z gornje strani škoja, ni pedeset kilometar dugo, va Like i Gorsken kotare, opet je z neba dudnjelo. Opet avioni, opet ofenziva: ov put JNA! Ni pravo finil jedan, a počel je drugi rat. I to je va arhive, spravno i čeka.

Čeka i slikarska ostavina od njije materi, od naše slavne slikarice Marije Brusić - Kovačice, ka je va jenen svojen dele od živjenja, pomagala krčken i puntarsken partizanon, bila njin je kurirka na pomoć.

Slikarice je baš njija ziškolana hćer Katica pomogla da otkrije i razvije svoj umjetnički talent. Otkrivala njoj je slikarske tehniki i njihe vrednosti, a motivi su njin bili isti: si s prelepega i čudovitega primorskega rodnega kraja. Katica je sigurno pejala materinu slikarsku ruku, va ono zlatno vreme našega naivnega slikarstva, isto tako umećnu, sigurnu ruku, autohtonu i posensega samouku. Materine su sliki bile po seh evropskeh galerijah, od Punta i Reki do Zagreba i Pariza.

Radi tega familija ni prodavala materine sliki, i naprvo su živeli z svojmi mićemi potrebami, aš je otela da se stori galerija tamo kade su te sliki doma, va Punte.

Na kraje, od zadnjega daha jene samozatajne Bodulki, ka svojen ni mogla niš zamerit, nego njin je davala se dobro od sega svojga ča j´ imela, morda ni čuda za reć: dragi si, njiji i naši, vrnite, najzad, sȅ ono ča njoj je za vrnut!

Draga Katȅ, neka ti je slobodan let z nebeskemi oblaki od materinskega pamuka i kolora!

Neka ti je lahka zemjica tvoja puntarska!

image0-001