Sušak je jedan od takoveh. Za sen ča j' imel Rečinu na granice i sam bil granica mej državami, za sen ča mu j' mosti rušilo i gradilo, ča j' imel more i svojo domaćo i stranjsko gospodarsko bogastvo, porat, štacjon, školi i slavnu gimnaziju s ke je zišlo se puno slavneh i va svete zaslužneh judi, korzo, hotel, hrvaski domaći judi i prišlići ki su ga zeli za svojga i ča j' imel sportaši ken je plivački olimpizan pokraden i ime dano zametskemu velemu, novemu trgu ki va vreme sušačkega procvata ni sanjal ni svojo hrvastvo na zapadnoj strane od Rečini, aš je bil va Talije.

I najzad, već malo ki od njegoveh grajani zna da j' imel i svoje lehi i senokoši pul samega mora, ke su svojni imele „suši“ va ken se j' držalo orude, na mesteh ke se danaska zovu Delta i Brajdica. Te suši dale su mu i ime, toliko ih je bilo. Ma ih nijedan ne spominje, kako na priliku kameni kažuni, samo zato ča su bili drveni i povjest ih je lahko važgala i poslala va dim. Još manje ih zna da j' po Mrtven kanale tekla Rečina, samo ča j' njija vela voda toliko pačila Reke da su je pul hotela „Kontinental“obrnuli malo na suncaistok i tako je Sušaku još i njegovega teritorija zamjeno.

Najzad je pošteno za reć i po pravice je, spametimo se i društveno-političke halabuki ka j' okole osandeseteh, morda malo prej, preglasala tako da j' ime Sušaku danaska sramežjivo zapisano samo na jenoj tabele pul reškega kazališta.

Se to ča j' imel, a više nima, Sušaku ni niš pomoglo. Do pred neki dan kad su mu, neki njegovi, zakantali na vas glas! I to na praven meste: va Hrvasken kulturnen dome na Sušake, va hotelsko-kazališnen komplekse kega su sprojektirali hrvaski već pozabjeni manje al više nesrećni hrvaski arhitekti, a sami Sušačani su ga i naručili i sfinancirali već isto tako pozabjenega 1934. leta!

Ča se j' dogodilo neki dan va soj toj povjesnoj zgube?!

Niš čudno, jubav za rojeno sušačko mesto već od kad je opkantana, doma i od domi, od Sušaka, pa se do lipe Boke! Pa se j' tako normalno rodil i mjuzikl va voje, žeje i dele od onisteh ki umeju i kantat i govorit! Za divno čudo i Sušačani su se spametili da su ime od svojga grada, i još čuda tega su cesti prejahale, zgubili mučeć! Za sen ča su mogli ku zakantat!

Moderno pak vreme ima svoji zakoni i, lepo j' bilo za videt i čut, estrada „drma“ jače od politiki. I lepše ju je i videt i čut, ča je, je! Pak se j' najzad moglo na glas i zreć i zakantat, ovako nekako, koliko se spametin, piše va librete, a zgovara oštar: „ ... ča tri zajiki si se ovde skupa z delon navadil, a va se te leta moje dve besedi nisi vredan zapametit i zreć ?! ... „

Niš prez oštarije, baren za početak!

Va se te leta, tamo od zadnjeh predstav hrvaskeh, čakavskeh bardi Gervaisa i Kompanjeta, najmanje dvajset i više let je pasalo, na pozornicu reškega kazališta, za semi prišlići, dođoši i furešti, ne moru se poprtit njihi bardovski, čakavski, priznati kazališni teksti. Znamjeni su z repertoara, aš “... ako niste zadovojni kako se zgovara tekst na pozornice, pak nećemo ga ni govorit ... „ Tako nekako bedasto su mi dopovedeli, nisan baš se pozabila.

Pak, kad je već oštarska, neka i ovo bude pulitika: skažite se baren sake četire leta i sprogovorite i zakantajte po domaću pod svečanun kazališnun koltrinun na koj su, „gle čuda“, najobičneji, posensega san sigurna, domaće i čakavske gromače!

Povjesneh vuki već ni, čakavski teksti svire po škabelineh, a z oštarije i s kažina je najlagje mobiliju zinest. Posal, od kad je sveta i veka i pisanega don Kihota još od Manči, nose kurbi, a neka oštarija je vaveki blizu i dela. Za oštaricu parićana!

Fotografije: SVeVID